எலியார்:
பாயசம் வைக்கவேணும்
பானையிலோ அரிசி இல்லை
முற்றிய நெற்கதிரே
அரிசி கொஞ்சம் தருவாயோ?
நெற்கதிர்:
நானெப்படித் தர முடியும்?
என்னை வளர்க்கும் வயலிடம் போய்க் கேள்
வயலிடம் போன எலியார்:
பாயசம் வைக்கவேணும்
பானையிலோ அரிசியில்லை.
முற்றிய நெற்கதிரே
நெல்லை வளர்த்த வயலே
அரிசி கொஞ்சம் தருவாயா?
வயல்:
நானெப்படித் தர முடியும்?
என்னை ஈரமாக்கி உதவும் நீரைப் போய்க் கேள்
நீரிடம் போன எலியார்:
பாயசம் வைக்க வேணும்
பானையிலோ அரிசியில்லை
முற்றிய நெற்கதிரே
நெல்லைவளர்த்த வயலே
வயலில் பாய்ந்த நீரே
அரிசி கொஞ்சம் தருவாயோ?
நீர்:
நானெப்படித் தரமுடியும்?
என்னை வரம்பு கட்டி இங்கே நீரைப் பாய விட்ட உழவனைப் போய்க் கேள்
உழவனிடம் போன எலியார்:
பாயசம் வைக்க வேணும்
பானையிலோ அரிசியில்லை
முற்றிய நெற்கதிரே
கதிரை வளர்த்த வயலே
வயலை நனைத்த நீரே
நீரைப் பாய்ச்சிய உழவா
அரிசி கொஞ்சம் தருவாயோ?
உழவனும் எலியாருக்கு அரிசி கொடுத்தார்.
எலியார் பாயாசம் வைத்தார்.
